Skeiðbrautin í Víðidalnum er heldur betur að gefa góða tíma en í 150m skeiðinu í gær fór Árni Björn Pálsson 150m á 13,89 sekúndum á hinni leirljósu Korku frá Steinnesi og sigruðu þau skeiðið nokkuð örugglega. Næstur á eftir þeim var skeiðmeistarinn Hans Þór Hilmarsson á Vorsól frá Stóra-Vatnsskarði á tímanum 14,08.

Eldjárn frá Skipaskaga hélt efsta sætinu á yfirliti í flokki 4 vetra stóðhesta sem fram fór í gær og vann því flokkinn með 8.44 í aðaleinkunn. Næstur á eftir kom glæsi klárhesturinn Fenrir frá Feti með 8.37. Hækkaði hann á yfirliti í 9.5 fyrir vilja og geðslag og er því nú með 9.5 fyrir bæði fegurð í reið og vilja og geðslag. Þriðji var Viðar frá Skör sem hlaut 8.29 í aðaleinkunn.

Fyrr í dag fóru fram B-úrslit í unglingaflokki þar sem margir af okkar efnilegustu knöpum sýndu snilli sína. Úrslitin voru gríðarlega jöfn og spennandi, t.d. voru það ekki nema 4 kommur sem skildu að 1. og 5. sætið. Það fór þó svo eftir harða keppni að Kári Kristinsson sigraði úrslitin á hinum flugrúma Þyt frá Gegnishólaparti og verður gaman að sjá þá í A-úrslitunum.

Lífland býður upp á fríar ferðir með Líflandsskutlunni frá Landsmóti í verslunina á Lynghálsi og í verslun Top Reiter í Ögurhvarfi. Rútan er staðsett við gönguleiðina á milli markaðssvæðisins og kynbótabrautarinnar.

B-úrslit í B-flokki fóru fram í morgun í hæglætisveðri þar sem Þrumufleygur frá Álfhólum og Viðar Ingólfsson fóru með sigur af hólmi með 8.79. Litlu munaði á þeim næsta hesti, sem var Arna frá Skipaskaga og knapi hennar, Sigurður Sigurðarson en þau hlutu 8.78. Hnoss frá Kolsholti og Helgi Þór Guðjónsson, sem komu efst inn í B-úrslit urðu að láta sér 11. sæti lynda.

Ragnar Snær Viðarsson sýndi hvers hann er megnugur þegar hann sigraði B-úrslitin í barnaflokki fyrr í dag á hinum einstaka Kamban frá Húsavík. Þeir félagar áttu frábæra sýningu sem tryggði þeim 8,73 í einkunn og sæti í A-úrslitunum.

Glúmur frá Dallandi gerði sér lítið fyrir og sigraði flokk stóðhesta 7 vetra og eldri á Landsmótinu í dag. Hlaut hann 8,80 fyrir kosti, 8,73 fyrir sköpulag og 8,77 í aðaleinkunn. Sýnandi Glúms var Halldór Guðjónsson. Næstir á eftir honum urðu svo tveir synir Kiljans frá Steinnesi, þeir Rauðskeggur frá Kjarnholtum 1 og Draupnir frá Stuðlum.

Skýsdóttirin Askja frá Efstu-Grund var hástökkvari 4 vetra flokks hryssna í gær þegar hún hækkaði sig um rúmar 30 kommur á yfirliti og skaut sér í 1. sætið með 8.38 í aðaleinkunn og 8.55 fyrir hæfileika. Sigurrós frá Stuðlum, sem var efst fyrir yfirlit, endaði í 2. sæti með 8.31 í aðaleinkunn og 8.37 fyrir hæfileika. Þriðja var Sýn frá Hólum með 8.30 í aðaleinkunn og 8.14 fyrir hæfileika.